NAKITA KO ANG ADA
Sa unang tingin ika'y mamangha
Kagandahan niya ay inukit mula pa noong akoy bata
Pantasya at kung anong hiwaga
Maswerte kang mamalas mo siya sa mukha
Sa batis na kay linaw ng tubig
Lugar kung saan puno ay hitik
Mistulang paraiso kung iyong mababatid
Tiyak ikaw ay hindi aalis
Mga kaibigan kong puspos ng kagalakan
Katahimikan ng gubat nagsilbing taguan
Ingatang huwag mahuli sa habulan
Kung ayaw mong umuwi ng luhaan
Sapagkat sa aking panaginip akoy nadapa
Mahinang tuhod at bato ay nagtama
Kirot at sakit ay lalong nadama
Nang malamang ako nalang mag-isa
Palibhasa ay bata at mahina ang loob
Luha at takot sa akin ay kumubkob
Bunganga at pamalo sa aming bakod
Naghihintay sa akin malakas na kutob
Ngunit Siya'y nagpakita
Nakangiting pinahid ang aking luha
Dinaiti ang kanyang palad ng bahagya
"Sa susunod ikaw ay mag-ingat", aniya
Magkaiba man sila ni nanay ng pagkakasabi
Ang Adang mahinhin at mayumi
Pinahid din ni inay ang luhang namutawi
Ginamot ang sugat nang madali
Nakita ko ang Ada
Sa katauhan ni ina..